Nesta Semana das Letras Galegas, dedicadas este ano 2012 a Valentín Paz Andrade, Cantares do Brión organiza unha charla-coloquio, xunto co Conservatorio Profesional de Música de Vigo e participa en dous actos para conmemorar estas datas:

• O martes día 15, ás 20:00 no Conservatorio Profesional de Música de Vigo, Moncho do Orzán ofrecerá unha charla-coloquio titulada «Os coros das Irmandades. Un xeito de vivir o País».
• O xoves día 17, ás 19:30 no Auditorio Municipal Lois Tobío de Gondomar, Cantares do Brión actuará no marco do Día das Letras Galegas organizado polo Instituto de Estudos Miñoranos, onde tamén se recitarán poemas de Valentín Paz Andrade.
• O domingo día 20, ás 19:00 Cantares do Brión actuará no Centro Cultural de Vincios para celebrar o Día das Letras Galegas organizado pola Asociación de Veciños Galiñeiro de Vincios.

O Coro Tradicional Cantares do Brión participou o pasado domingo 22 de abril na Sentada Lectora organizada por Espazo Lectura na Alameda de Gondomar para celebrar o Día do Libro e a Lectura. Antes de que Cantares do Brión pechase o acto con varias cantigas, interviu o grupo Migallas, as persoas asistentes sentaron a ler durante dez minutos e a xornalista Araceli Gonda e mais a actriz Paula Carballeira leron un manifesto a favor da lectura.

Deixamos aquí as fotografías do evento realizadas por Manuel G. Vicente:

Cantares do Brión actuamos no acto de nomeamento como Economista do Ano de Xosé Mª Fonseca Moretón, que tivo lugar o día 16 de marzo no Hotel Pazo Los Escudos, na parroquia de Alcabre, en Vigo; un evento que convoca anualmente o Colexio de Economistas de Pontevedra e que nesta ocasión estivo presidido polo presidente da Xunta de Galicia e outras autoridades, e contou coa asistencia dunhas 300 persoas.

Xosé Mª Fonseca Moretón é presidente do consello de administración de Bodegas Terras Gauda, tamén de Viñedos e Bodegas Pittacum e, asemade, da Fundación para la Cultura del Vino.

O noso coro sumouse á homenaxe, «non por motivos protocolarios ou de compromiso, senón por compartir cousas como o amor polo viño, pola música e pola tradición», como dixo o noso presidente no curso do acto.

Sabedores da súa afección pola música –Xosé Mª foi integrante no seu día da Charanga do Cuco de Velle e na actualidade é compoñente do grupo Con la Venia– preparamos «A Rosiña»,  peza destacada do repertorio da charanga ourensana, e convidamos ao homenaxeado a interpretala con nós, como se pode ver nunha das fotografías.

X. Mª Fonseca Moretón cantando «A Rosiña» co Coro Tradicional Cantares do Brión

O homenaxeado saudando ao noso director, Pablo Rial

Vista xeral dos asistentes ao acto

O día 30 de decembro de 2011, no Concerto de Fin de Ano, celebrado no salón de actos do Centro Cultural de Vincios, o Coro Tradicional Cantares do Brión rendeu homenaxe a Rosalía Hermida Pérez, de 91 anos, natural da casa da Laxe en Xián, da parroquia de Vincios, e na actualidade veciña de Vilaza.

A súa neta, a compañeira corista Elsa Quintas, recolleu á señora Rosalía abundantes coplas populares que esta aprendeu á súa vez dos seus pais, durante as tarefas cotiás. Mentres Domingos Hermida facía o viño na adega cantaba ao desafío coa súa dona, Carmela, que fiaba no primeiro andar da casa da Laxe. Seica lle daban moito xeito e rían a cachón os desafiadores e mais as fillas. E así se foi gravando na excelente memoria de Rosalía un patrimonio inmaterial de valor incalculábel que hoxe aproveitamos os máis novos, e que deu lugar á peza por nós titulada “Na Touba do Brión”. O pasado decembro o coro tivo a oportunidade de interpretar, máis unha vez, esta peza, para a que o tamén compañeiro Luís Correa compuxo a música.

Quixemos así simbolizar o importante que para nós é recibir dos devanceiros o testemuño do folclore, da nosa lingua e dos costumes de tempos que veñen de moi atrás.

Na homenaxe a señora Rosalía recibiu un ramo de flores de mans da súa neta, ao tempo que o noso presidente Xosé Crego entregaba a Luís “O Caruncho” unha rosa vermella en recoñecemento do seu desinteresado labor como compositor.

Agradecémoslle as fotografías a Alfredo López «Tokio».

É a música, a popular máis concretamente, a que mellor expresa a historia dun pobo e a súa personalidade.

O que escoite ao lonxe un aturuxo, ou o son do roncón dunha gaita, non pode dicir que os seus sentidos non esperten e eleven o nivel de atención para agardar o que vén detrás. Latexan aí os sons máis singulares que nos definen como pobo e que, como no lenzo dunha obra mestra do mellor pintor, van debuxando no éter as máis variadas e plásticas imaxes, só coa imaxinación e a capacidade evocadora que nos transportan esas notas e eses sons.

Mais non esquezamos que o mellor instrumento musical que o ser humano domina é a voz. E aí si que non hai lenzo que recolla toda a gama de efectos e imaxes sonoras que se poden producir.

Pois ben, hoxe estamos aquí para gozar dunha boa mostra dese mellor “cadro” musical, acompañados de dúas magníficas agrupacións de homes e mulleres que atesouran o legado máis íntimo do noso pobo: a súa música e a canción popular.

Serán, pois, as súas voces as que nos fagan emocionar e… prepárense!, porque van facer tremer con dita emoción o chan, as cadeiras e butacas deste auditorio Lois Tobío de Gondomar.

Hai moita historia e moito futuro neste festival que nace hoxe, e un gran desexo de espallar e divulgar, como se merece, ese gran legado que dende hai moito tempo os coros tradicionais galegos veñen facendo das nosas máis persoais pezas musicais.

Con estas palabras do profesor e destacado membro do Instituto de Estudos Miñoranos, Xilberte Manso de la Torre, comezaba o I Encontro de Coros Tradicionais CANTARES NO MIÑOR, que congregou na noite do sábado, 21 de xaneiro, unhas 300 persoas que ateigaron –e aínda nun bo número tiveron que dar a volta ao se encher– o Auditorio Municipal Lois Tobío, de Gondomar, para escoitar a Agrupación Folclórica CANTIGAS E AGARIMOS, de Santiago de Compostela, e o Coro Tradicional CANTARES DO BRIÓN, con sede na parroquia miñorana de Vincios.

Ao longo de case dúas horas, voces, gaitas, bailadores e bailadoras teceron un fío que uniu os nosos devanceiros de séculos atrás coa creación cultural máis actual do noso pobo.

Repertorios do canto tradicional que encheron de emoción aos asistentes a un evento que rematou cos dous coros no escenario interpretando a Foliada de Carril e mais o Himno Galego, co público posto en pé, participando activamente no solemne final.

Ao remate, coristas das dúas agrupacións participaron nunha merenda-foliada que tivo lugar no Pazo da Escola, tamén de Gondomar, nun ambiente festivo e de grande irmandade.

Aquí queda unha serie de fotografías, que lle agradecemos a Gabriela Legaspi, dalgúns momentos da noite.

O sábado 21 de xaneiro, a partir das 20:30h, no Auditorio Municipal Lois Tobío de Gondomar, celébrase o evento «CANTARES NO MIÑOR. I Encontro de Coros Tradicionais». No acto participarán a Agrupación Folclórica CANTIGAS E AGARIMOS, de Santiago de Compostela, e o Coro Tradicional CANTARES DO BRIÓN, do Centro Cultural de Vincios (Gondomar), que é a entidade organizadora. O acto será presentado por Xilberte Manso de la Torre, profesor do Instituto ProVal e membro destacado do Instituto de Estudos Miñoranos.

Despois de que Perfecto Feijoo crease en 1883 en Pontevedra a agrupación coral Aires da Terra, a comezos do século XX formáronse algúns dos coros que aínda hoxe permanecen, como Toxos e Froles (Ferrol, 1915), Cántigas da Terra (A Coruña, 1916), De Ruada (Ourense, 1919) ou Cantigas e Agarimos (Compostela, 1923). Estas formacións preservaron a tradición coral que chega aos nosos días arrequecida pola achega popular durante décadas de actividade a prol da música, da cultura e do idioma de Galicia.

Seguindo a súa estela, durante os últimos anos xurdiron en Galicia algúns coros de corte tradicional, entre os que se atopa Cantares do Brión (do Centro Cultural de Vincios), que ten as primeiras actuacións públicas en 2009 e que se constitúe formalmente o 7 de marzo de 2010. A súa presentación oficial celébrase o 22 de xaneiro de 2011, apadriñados polo coro Cántigas da Terra.

A proximidade desta data de presentación é a escollida para celebrar de hoxe en diante o que chamaremos «CANTARES NO MIÑOR. Encontro de Coros Tradicionais». Como o seu nome indica, este evento terá como marco a comarca do Val Miñor e por aquí pasarán, nos próximos anos, as agrupacións corais máis representativas de Galicia, sempre baixo o signo da tradición musical galega.

Día 18 de decembro, en Mañufe

O domingo, 18 de decembro, ás 20:00 horas actuaremos no Concerto de Nadal do Centro Cultural de Mañufe (Gondomar), compartindo escenario co coro desa entidade. Na foto, un momento da actuación nese mesmo lugar o 27 de decembro de 2009, cando aínda non tiñamos preparados os traxes de gala cos que saímos ao escenario na actualidade.

Día 30 de decembro, en Vincios

O venres, 30 de decembro, ás 20,30 horas, concerto no Centro Cultural de Vincios (Gondomar), con algunhas novidades: pezas novas, interpretacións instrumentais e parellas de baile. Na foto, durante a presentación oficial de Cantares do Brión no Centro Cultural de Vincios, o 22 de xaneiro de 2011.

No Galiñeiro

A solicitude da Plataforma pola Protección da Serra do Galiñeiro participamos o día 18 de setembro na II Andaina Aloia-Galiñeiro interpretando na panasqueira de riba, no merendeiro da Comunidade de Montes de Vincios, varias pezas do noso repertorio.

Ensaio na rúa

O domingo, 30 de outubro, o ensaio habitual do coro tivo lugar na Alameda de Gondomar, rodeados de amigos e conveciños.

Na voda de Pablo e Mirian

O día 19 de novembro acudimos ás portas do Xulgado de Paz de Gondomar onde casaron a nosa tesoureira, Mirian, e o noso director, Pablo. Despois do estoupido dunha considerable traca de petardos prendida polos amigos da parroquia de Vincios, de onde os noivos son naturais, o coro Cantares do Brión, que ocupou a metade da rúa, interpretou o Alalá nº 3 e a Foliada de Vincios. A seguir, sesión vermú no café Rañolas, convidados polos contraentes.

O martes 16 de agosto ás 22,30 horas, no Campo das Redes, en Panxón (Nigrán), Cantares do Brión ofrecerá o seu primeiro concerto en solitario.

A actuación está enmarcada no programa de actividades de agosto de 2011 que organiza a Concellería de Cultura, Turismo e Deporte do Concello de Nigrán.

Alí interpretaremos o repertorio que nos caracteriza: alalás, foliadas, pandeiradas…, con algunha novidade, como a peza titulada «Na Touba do Brión», que estreamos hai poucas semanas no II Festival Folc Illa de San Simón, en Cesantes. A letra desta peza son varias coplas recollidas por Rosalía Hermida Pérez, natural de Xián – Vincios (Gondomar) e avoa dunha das compañeiras do coro; a música é de Luís Correa «Caruncho», tamén membro de Cantares do Brión.

Este concerto é moi importante para nós, por celebrarse no Val Miñor, nun concello onde aínda non estiveramos, e no marco da programación de verán, nun lugar onde anteriormente estiveron Milladoiro, Berrogüetto, Son de Seu e outras agrupacións de primeira liña.

A partir das 20:30 horas do sábado 9 de xullo o Coro Tradicional Cantares do Brión acudirá á parroquia de Cesantes, no concello de Redondela, onde se vai desenvolver o II Festival Folc Illa de San Simón.
Será no salón de actos do Centro Cultural Deportivo de Cesantes e, ademais do noso Coro, actuará o Grupo de Baile e Gaitas Airiños de San Simón.
A primeira edición deste Festival tivo lugar o pasado ano e nel actuou o grupo de música tradicional Os Carunchos.
No repertorio de Cantares do Brión, os alalás, foliadas e pandeiradas que nos caracterizan, coa estrea da peza «Na Touba do Brión», con letra popular e música do noso compañeiro, o afamado gaiteiro Luís Correa.